इतर

बीडमध्ये ७३ शिक्षकांची सेवा समाप्त; बनावट पदे निर्माण करून नियुक्त्या केल्याचा धक्कादायक प्रकार!

बोगस दिव्यांग प्रमाणपत्रांचा वापर; बनावट आदेश आणि नियुक्ती प्रक्रियेतील अनियमितता उघड

बीड, २१ नोव्हेंबर : बीड जिल्ह्यात शिक्षक भरती आणि नियुक्ती प्रक्रियेत मोठ्या प्रमाणावर अनियमितता झाल्याचा धक्कादायक प्रकार समोर आला आहे. बनावट पदे निर्माण करणे, खोटे नियुक्ती आदेश तयार करणे तसेच बोगस दिव्यांग प्रमाणपत्रांच्या आधारे लाभ मिळवणे अशा गंभीर बाबी तपासात उघड झाल्या आहेत. या प्रकरणी शिक्षण विभागाने कठोर कारवाई करत तब्बल ७३ शिक्षकांची सेवा समाप्त करण्याचा निर्णय घेतला आहे.

मिळालेल्या माहितीनुसार, बीड जिल्ह्यातील प्राथमिक आणि माध्यमिक शिक्षण विभागातील शिक्षक नियुक्त्यांमध्ये अनेक अनियमितता आढळून आल्या. प्राथमिक विभागातील ७ आणि माध्यमिक विभागातील ६६ अशा एकूण ७३ शिक्षकांची सेवा समाप्त करण्यात आली आहे. या कारवाईमुळे शिक्षण क्षेत्रात मोठी खळबळ उडाली आहे.

बनावट आदेश आणि नियुक्त्यांचे प्रकरण उघड

तत्कालीन शिक्षणाधिकाऱ्यांच्या स्वाक्षरीने तयार करण्यात आलेल्या बनावट आदेशांवर चुकीच्या पद्धतीने आवक-जावक क्रमांक टाकण्यात आल्याचे तपासात उघड झाले. तसेच नोंदवहीमध्ये खाडाखोड आणि हेराफेरी केल्याचेही समोर आले आहे. चौकशी समितीच्या तपासात या गंभीर अनियमितता उघड झाल्यानंतर संबंधित प्रकरणाची सखोल चौकशी करण्याची मागणी करण्यात आली होती.

बोगस दिव्यांग प्रमाणपत्रांचा वापर

बदलीत लाभ मिळवण्यासाठी काही शिक्षकांनी बोगस दिव्यांग प्रमाणपत्रे सादर केल्याचेही तपासात आढळून आले. या प्रकरणात ५२ शिक्षकांनी बोगस दिव्यांग प्रमाणपत्रे तयार केल्याचे उघड झाले. त्यानंतर संबंधित शिक्षकांची चौकशी करून दोषी आढळलेल्यांवर निलंबनाची कारवाई करण्यात आली होती.

शिक्षण विभागाकडून कठोर निर्णय

शिक्षण विभागाने या संपूर्ण प्रकरणाची गंभीर दखल घेत ७३ शिक्षकांची सेवा समाप्त करण्याचा निर्णय घेतला आहे. सन २०२१ पासून शिक्षक भरती प्रक्रियेतील अनियमिततेबाबतही जिल्ह्यातील काही शिक्षकांना नियुक्ती देण्यात आल्याच्या आरोपांची चौकशी सुरू आहे.

न्यायालयाच्या आदेशांचा सोयीस्कर अर्थ लावून नियुक्त्या करण्यात आल्याच्या तक्रारीही समोर आल्या आहेत. काही शाळांमध्ये संचमान्यतेच्या निकषांनुसार पदे वाढवण्यात आली, तर काही ठिकाणी बनावट विद्यार्थीसंख्येच्या आधारे संचमान्यता वाढवून अतिरिक्त पदांची निर्मिती करण्यात आल्याचा संशय व्यक्त करण्यात आला आहे.

संपूर्ण अभिलेख सादर करण्याचे निर्देश

सन २०१९ ते २०२५ या कालावधीत बीड जिल्ह्यात संवर्गमान्यता मिळवलेल्या सर्व शिक्षकांची सखोल माहिती आणि कुंडली गोळा करण्याचे काम सुरू आहे. यासंदर्भातील संपूर्ण अभिलेख तातडीने सादर करण्याचे निर्देश शिक्षण विभागातील संबंधित अधिकाऱ्यांना देण्यात आले आहेत.

या प्रकरणात दोषी आढळणाऱ्यांवर कठोर कारवाई करण्यात येणार असल्याचे शिक्षण संचालक माधव पालकर यांनी स्पष्ट केले आहे.

बीड जिल्ह्यातील या कारवाईमुळे शिक्षक भरती प्रक्रियेतील पारदर्शकता, नियुक्त्यांची वैधता आणि शिक्षण विभागाच्या प्रशासकीय कार्यपद्धतीवर पुन्हा एकदा प्रश्नचिन्ह निर्माण झाले आहे.

header