पीएम मोदींनी शुक्रवारी मोठी घोषणा केली आहे. एकाच दिवसात देशातील तीन सेलिब्रेटींना भारतरत्नने सन्मानित करण्यात येणार असल्याची घोषणा करण्यात आली आहे. माजी पंतप्रधान चौधरी चरणसिंग, नरसिंह राव आणि हरित क्रांतीचे जनक एमएस स्वामीनाथन यांना भारतरत्न देण्यात येणार आहे. पंतप्रधान मोदींनी ही घोषणा केली आहे.देशाचे माजी पंतप्रधान चौधरी चरणसिंग यांना भारतरत्न देऊन सन्मानित करण्यात येत आहे हे आमच्या सरकारचे भाग्य आहे, असे मोदींनी ट्विटरवरील त्यांच्या पोस्टमध्ये लिहिले आहे. हा सन्मान त्यांनी देशासाठी दिलेल्या अतुलनीय योगदानाला समर्पित आहे. त्यांनी आपले संपूर्ण आयुष्य शेतकऱ्यांच्या हक्कासाठी आणि त्यांच्या कल्याणासाठी समर्पित केले होते. उत्तर प्रदेशचे मुख्यमंत्री असो किंवा देशाचे गृहमंत्री असो आणि आमदार असतानाही त्यांनी राष्ट्र उभारणीला नेहमीच चालना दिली, असेही त्यांनी लिहिले आहे. आणीबाणीच्या विरोधातही ते ठामपणे उभे राहिले. त्यांचे आमच्या शेतकरी बंधू-भगिनींप्रती असलेले समर्पण आणि आणीबाणीच्या काळात लोकशाहीप्रती असलेली त्यांची बांधिलकी संपूर्ण देशाला प्रेरणादायी आहे.
