तीन महिन्यांपासून पाणीपुरवठा ठप्प; पाच दिवसांत दुरुस्ती न झाल्यास महिलांचा ‘घागर मोर्चा’
मुलचेरा
नगरपंचायत मुलचेरा अंतर्गत कोपरल्ली माल येथील प्रभाग क्रमांक १५ मधील सोलर ड्युअल पंपवर आधारित नळपाणीपुरवठा योजना मागील मे महिन्यापासून बंद असल्याने परिसरातील नागरिकांमध्ये तीव्र नाराजी व्यक्त होत आहे. गेल्या तीन महिन्यांपासून पाणीपुरवठा ठप्प असल्यामुळे नागरिकांना पाण्यासाठी मोठी धावपळ करावी लागत असून, विशेषतः महिलांना याचा मोठा त्रास सहन करावा लागत आहे.
पाणीपुरवठा योजना सुरू करण्यासाठी संबंधित प्रशासनाकडे अनेक वेळा तोंडी तसेच प्रत्यक्ष स्वरूपात समस्या मांडण्यात आल्याचे नागरिकांचे म्हणणे आहे. मात्र, अद्यापही योजनेची दुरुस्ती न झाल्याने नागरिकांमध्ये संताप वाढला आहे. दैनंदिन वापरासाठी पाणी मिळविताना नागरिकांना पर्यायी व्यवस्था करावी लागत आहे.
नागरिकांच्या म्हणण्यानुसार, केवळ पंपाची मोटार दुरुस्त करून प्रश्न सुटणार नसून संपूर्ण पाणीपुरवठा योजनेची पाहणी करून आवश्यक दुरुस्ती करणे गरजेचे आहे. बंद पडलेले नळ सुरू करणे, तुटलेले स्टँड पोस्ट दुरुस्त करणे, आवश्यक ठिकाणी नवीन प्लॅटफॉर्म तयार करणे, पाण्याची टाकी स्वच्छ करणे, नवीन फिल्टर बसविणे तसेच नादुरुस्त मोटार दुरुस्त करणे आदी कामे तातडीने करण्याची मागणी नागरिकांनी केली आहे.
पाणीपुरवठा योजना बंद असल्याने घरगुती वापरासाठी पाणी उपलब्ध करून घेण्याची जबाबदारी महिलांवर मोठ्या प्रमाणात पडत आहे. त्यातच शेतीचा हंगाम सुरू असल्याने घरगुती पाण्याची व्यवस्था आणि शेतीची कामे अशी दुहेरी कसरत नागरिकांना करावी लागत आहे. त्यामुळे प्रशासनाने या प्रश्नाकडे गांभीर्याने लक्ष देण्याची मागणी होत आहे.
दरम्यान, नागरिकांनी आता प्रशासनाला पाच दिवसांची मुदत दिली आहे. येत्या पाच दिवसांत कोपरल्ली माल येथील पाणीपुरवठा योजना पूर्णपणे दुरुस्त करून नियमित पाणीपुरवठा सुरू करण्यात यावा, अशी ठाम मागणी करण्यात आली आहे.
याबाबत १० सप्टेंबर २०२६ रोजी नगरपंचायत मुलचेरा येथील मुख्याधिकाऱ्यांना निवेदन देण्यात आले आहे. निवेदनातून पाणीपुरवठा योजनेची तातडीने पाहणी करून आवश्यक दुरुस्तीची कामे पूर्ण करण्याची मागणी करण्यात आली आहे.
प्रशासनाने दिलेल्या मुदतीत पाणीपुरवठा सुरळीत केला नाही, तर महिला व नागरिकांच्या वतीने नगरपंचायत कार्यालय, मुलचेरा येथे ‘घागर मोर्चा’ काढण्यात येईल, असा स्पष्ट इशारा निवेदनातून देण्यात आला आहे. या माध्यमातून प्रशासनाचे लक्ष वेधून पाणीप्रश्नाबाबत निषेध नोंदविण्यात येणार असल्याचे नागरिकांनी स्पष्ट केले आहे.
पाणी ही नागरिकांची मूलभूत गरज असून, तीन महिन्यांपासून पाणीपुरवठा बंद असणे ही गंभीर बाब असल्याचे नागरिकांचे म्हणणे आहे. त्यामुळे प्रशासनाने केवळ आश्वासन न देता प्रत्यक्ष दुरुस्तीची कामे करून नियमित व सुरळीत पाणीपुरवठा सुरू करावा, अशी मागणी जोर धरत आहे.
या मागणीसाठी श्री. प्रमोद गोटेवार, श्री. मुरलीधर ओडेंगवार, श्री. अंकुश गोंगले, श्री. ध्रुप दिवटीवार आणि श्री. एकनाथ गरतुळवार यांनी पुढाकार घेत नगरपंचायत प्रशासनाला निवेदन सादर केले आहे.
आता प्रशासनाकडून या पाणीप्रश्नाची कितपत तातडीने दखल घेतली जाते आणि पाच दिवसांच्या मुदतीत पाणीपुरवठा पूर्ववत होतो की नागरिकांना ‘घागर मोर्चा’ काढावा लागतो, याकडे कोपरल्ली मालसह मुलचेरा शहरातील नागरिकांचे लक्ष लागले आहे.
