प्रवाशांना आता एसटीसाठी ताटकळत बसावे लागणार नाही. एसटी कोणत्या भागातून धावतेय, तिचे शेवटचे लोकेशन काय, बसस्थानकावर येण्यास तिला किती वेळ लागेल, अशी सारी माहिती आता प्रवाशांना मिळणार आहे.
रेल्वेच्या धर्तीवर राज्य परिवहन महामंडळही प्रवाशांसाठी ‘व्हेइकल ट्रॅकिंग सिस्टीम’ (व्हीटीएस) यंत्रणा सुरु करणार आहे. त्यामुळे प्रवाशांना संबंधित एसटीचे नेमके लोकेशन समजण्यास मदत होणार आहे. एसटी सुटण्याची नि पोहोचण्याची वेळही समजू शकेल.
आगारांमध्ये डिस्प्ले बोर्ड
एसटी महामंडळातर्फे प्रत्येक आगारांमध्ये डिस्प्ले बोर्ड बसविले असून, लवकरच ते कार्यान्वित केले जातील. त्यावर प्रवाशांना आपली एसटी नेमकी कुठे आहे, याचे लोकेशन समजेल. शिवाय, एसटीला अपघात झाल्यास, या यंत्रणेमुळे तात्काळ मदतही करता येईल.
एसटी महामंडळ लवकरच सर्व गाड्यांमध्ये ‘व्हीटीएस’ प्रणाली बसविणार आहे. प्रायोगिक तत्त्वावर काही गाड्यांमध्ये ही यंत्रणा बसविण्यात आली आहे. काही ठिकाणी स्क्रिनच्या अडचणी आहेत. मात्र, येत्या आठ दिवसांत ‘लाइव्ह लोकेशन’ प्रणालीचे काम पूर्ण होईल, अशी माहिती एसटी महामंडळाचे उपाध्यक्ष व व्यवस्थापकीय संचालक शेखर चन्ने यांनी दिली.
