अहेरी : दुर्गम आणि अतिदुर्गम भागातील गरोदर माता व बालकांना दर्जेदार आरोग्यसेवा मिळावी, यासाठी कोट्यवधी रुपये खर्च करून उभारण्यात आलेल्या अहेरी येथील महिला व बाल रुग्णालयाला रिक्त पदांचे ग्रहण लागले आहे.
मुख्यमंत्री देवेंद्र फडणवीस यांच्या हस्ते ८ नोव्हेंबर २०२५ रोजी लोकार्पण झालेल्या या रुग्णालयाला वर्ष पूर्ण होत आले, तरी नियमित पदे पूर्णपणे भरलेली नाहीत. विशेष म्हणजे, १३ फेब्रुवारी २०२६ रोजी आरोग्यमंत्र्यांनी प्रत्यक्ष भेट देऊन पाहणी केली होती आणि महिनाभरात पदे भरण्याची ग्वाही दिल्याचे सांगितले जात आहे. मात्र, अद्याप अपेक्षित कार्यवाही न झाल्याने आरोग्य विभागाच्या भूमिकेवर प्रश्नचिन्ह निर्माण झाले आहे.
*४२ नियमित पदे मंजूर; प्रतिनियुक्तीमुळेही मनुष्यबळाची कमतरता*
रुग्णालयासाठी ४२ नियमित आणि बाह्य यंत्रणेमार्फत १०३ पदे मंजूर आहेत. बाह्य स्रोतामार्फत पदे भरल्याचे सांगितले जात असले, तरी नियमित पदांचा प्रश्न कायम आहे. त्यातच काही अधिकारी-कर्मचारी प्रतिनियुक्तीवर असल्याने रुग्णालयाच्या कारभारावर परिणाम होत असल्याची बाब समोर आली आहे. अहेरी, मुलचेरा, एटापल्ली, भामरागड आणि सिरोंचा या पाच तालुक्यांसाठी महत्त्वाच्या असलेल्या रुग्णालयात तज्ज्ञ डॉक्टर व आवश्यक मनुष्यबळ उपलब्ध नसल्याने गरोदर माता आणि बालकांच्या आरोग्यसेवेचा प्रश्न ऐरणीवर आला आहे.
*दोन दिवसांत पदे भरा, अन्यथा १३ ऑक्टोबरला कुलूप!*
या परिस्थितीची दखल घेत आमदार डॉ. धर्मराव बाबा आत्राम यांनी जिल्हा शल्यचिकित्सक डॉ. गावंडे यांच्याशी भ्रमणध्वनीद्वारे संपर्क साधून दोन दिवसांचा अल्टिमेटम दिला आहे. या मुदतीत रिक्त पदे भरून प्रतिनियुक्तीवरील अधिकारी-कर्मचाऱ्यांना हजर करावे, अन्यथा १३ ऑक्टोबर रोजी रुग्णालयाला भेट देऊन पाहणी करत कुलूप ठोकणार, असा इशारा त्यांनी दिला.
माता व बालमृत्यूच्या प्रमाणाबाबत चिंता व्यक्त होत असताना, कोट्यवधी रुपये खर्चून उभारलेल्या रुग्णालयात पुरेसे वैद्यकीय मनुष्यबळ उपलब्ध का नाही, असा सवाल उपस्थित होत आहे. आता आमदारांच्या अल्टिमेटमनंतर आरोग्य विभाग काय कार्यवाही करतो आणि रुग्णालयातील पदभरतीचा प्रश्न मार्गी लागतो का, याकडे पाचही तालुक्यांतील नागरिकांचे लक्ष लागले आहे.
