एटापल्ली:
एटापल्ली तालुक्यातील रस्ते, आरोग्य व्यवस्था, कोरणार पूल, वाघांचा वाढता धोका, धान बोनस आणि वादग्रस्त ठरत असलेले स्मार्ट मीटर यांसारख्या अत्यंत महत्त्वाच्या व गंभीर प्रश्नांवर सामाजिक व राजकीय कार्यकर्त्या भाग्यश्री आत्राम-हलगेकर यांनी आक्रमक भूमिका घेतली आहे. त्यांनी या सर्व प्रलंबित मागण्यांबाबत थेट एटापल्लीच्या तहसीलदारांना निवेदन सादर केले असून, जनतेचे प्रश्न रखडवून ठेवणाऱ्या प्रशासनाला जाहीर जाब विचारला आहे.
काय आहेत मुख्य मागण्या?
तालुक्यातील अंतर्गत आणि मुख्य रस्त्यांची दुरवस्था झाली असून आरोग्याचा प्रश्न बिकट बनला आहे. पावसाळ्यात कोरणार पुलाच्या रखडलेल्या कामामुळे नागरिकांना मोठा त्रास सहन करावा लागतो. तसेच, परिसरात वाघांच्या वाढत्या दहशतीमुळे नागरिकांमध्ये भीतीचे वातावरण आहे. याशिवाय शेतकऱ्यांचा धान बोनस आणि सक्तीने बसवले जाणारे स्मार्ट मीटर या मुद्द्यांवरून जनतेमध्ये प्रचंड असंतोष निर्माण झाला आहे.
तीव्र आंदोलनाचा दिला इशारा:
निवेदन सादर केल्यानंतर बोलताना भाग्यश्री आत्राम-हलगेकर म्हणाल्या, “जनतेच्या हक्काच्या मागण्यांवर आता केवळ कागदी आश्वासने नकोत, तर प्रशासनाने तातडीने प्रत्यक्ष कारवाई करून हे प्रश्न मार्गी लावले पाहिजेत.” जर या गंभीर समस्यांवर प्रशासनाने त्वरित आणि ठोस पावले उचलली नाहीत, तर येत्या काळात संपूर्ण तालुक्यात तीव्र लोकआंदोलन छेडण्यात येईल, असा स्पष्ट इशारा त्यांनी यावेळी प्रशासनाला दिला आहे.
“जनतेच्या हक्कासाठी आमचा हा संघर्ष असाच सुरू राहील,” असा निर्धारही त्यांनी शेवटी व्यक्त केला. या आंदोलनात्मक पवित्र्यामुळे आता प्रशासन या मागण्यांवर काय कारवाई करते, याकडे संपूर्ण एटापल्ली तालुक्याचे लक्ष लागले आहे.
