सिरोंचा:
तालुक्यातील शेतकऱ्यांच्या शेतमाल वाहतुकीची आणि वहिवाटीची वर्षानुवर्षांची गंभीर समस्या कायमस्वरूपी मार्गी लावण्यासाठी सिरोंचा भूमी अभिलेख कार्यालय आता पूर्णपणे ‘ॲक्शन मोड’मध्ये आले आहे. तालुक्यातील जानमपल्ली येथे ‘मुख्यमंत्री बळीराजा शेत पाणंद रस्ते योजना’ अंतर्गत रस्त्यांच्या मोजणीला आणि मार्किंगला प्रत्यक्ष सुरुवात झाली असून, प्रशासनाच्या या गतिमान भूमिकेमुळे स्थानिक बळीराजांमध्ये आनंदाचे वातावरण पसरले आहे.
काय आहे ही महत्त्वाकांक्षी योजना?
‘मुख्यमंत्री बळीराजा शेत पाणंद रस्ते योजना’ ही महाराष्ट्र शासनाच्या महसूल विभागामार्फत राबवली जाणारी एक अत्यंत महत्त्वाकांक्षी योजना आहे. शेतातील हक्काचे पिके सुरक्षितपणे बाजारात नेण्यासाठी आणि विशेषतः पावसाळ्यात चिखलामुळे शेतकऱ्यांना शेतात जाण्यासाठी येणाऱ्या सर्व अडचणी दूर करणे, हाच या योजनेचा मुख्य उद्देश आहे. शेतकऱ्यांची हीच वर्षानुवर्षांची अडचण दूर करण्यासाठी प्रशासनाने थेट बांधावर जाऊन मोहीम हाती घेतली आहे.
आधुनिक तंत्रज्ञानाचा वापर; एकाही शेतकऱ्यावर अन्याय नाही
जानमपल्ली येथील पाणंद रस्त्याचे काम कायदेशीर आणि अत्यंत अचूक पद्धतीने व्हावे, यासाठी भूमी अभिलेख कार्यालयाचे उत्कृष्ट भूकरमापक (सर्वेअर) आर. एस. सिडाम यांनी आपल्या कौशल्याचा व आधुनिक तंत्रज्ञानाचा वापर केला. कोणत्याही शेतकऱ्याचे नुकसान होणार नाही आणि रस्ताही मोकळा व सुटसुटीत होईल, अशा सूक्ष्म नियोजनाने त्यांनी रस्त्याचे पॉईंट्स निश्चित केले.
महसूल, ग्राम प्रशासन आणि भूमी अभिलेखचा ‘त्रिवेणी संगम’
हे मोजणीचे काम अत्यंत शांततेत आणि गतीने पूर्ण होण्यामागे प्रशासकीय समन्वयाचा मोठा वाटा ठरला. जानमपल्ली येथील स्थानिक पटवारी (तलाठी) आणि कोतवाल यांनी प्रत्यक्ष घटनास्थळी उपस्थित राहून भूकरमापक सिडाम सरांना पाणंद रस्त्याची जुनी वहिवाट आणि हद्दी दाखवून मोलाचे सहकार्य केले. या तिन्ही विभागांच्या उत्कृष्ट समन्वयामुळे ही मोजणी प्रक्रिया विनाअडथळा यशस्वी झाली.
सिरोंचा तालुक्यात पाणंद रस्त्यांची मोहीम आणखी तीव्र होणार
शेतकऱ्यांच्या सुविधेसाठी सिरोंचा तालुक्यातील भूमी अभिलेख प्रशासन आता पूर्ण ताकदीने मैदानात उतरले आहे. जानमपल्ली येथील या यशस्वी मोहिमेनंतर, तालुक्यातील इतरही गावांमध्ये प्रलंबित असलेले पाणंद रस्त्यांचे प्रश्न तातडीने निकाली काढण्यासाठी प्रशासन सज्ज झाले आहे. हे रस्ते मोकळे झाल्यामुळे शेतकऱ्यांचा वेळ आणि पैसा दोन्ही वाचणार असून, शेती कामांना मोठी गती मिळणार आहे.
प्रशासनाच्या या कौतुकास्पद व शेतकरी हिताच्या कामगिरीबद्दल जानमपल्ली येथील समस्त शेतकरी बांधवांनी भूकरमापक आर. एस. सिडाम, स्थानिक पटवारी, कोतवाल आणि भूमी अभिलेख कार्यालयाचे जाहीर आभार मानले आहेत.
