वाहनचालक आणि नागरिकांचा संताप; तातडीने दुरुस्तीची मागणी
मुलचेरा, दि. २१ : मुलचेरा तालुक्यातील प्रमुख रस्त्यांची अवस्था दिवसेंदिवस अत्यंत बिकट होत असून, पावसाळ्यात या रस्त्यांवर मोठमोठे खड्डे पडल्याने नागरिकांना जीव मुठीत धरून प्रवास करावा लागत आहे. अनेक ठिकाणी रस्त्यावर एवढे मोठे खड्डे पडले आहेत की, “रस्त्यात खड्डे की खड्ड्यात रस्ते?” असा प्रश्न नागरिक उपस्थित करत आहेत.
सततच्या पावसामुळे रस्त्यांवरील खड्ड्यांमध्ये पाणी साचत असल्याने खड्ड्यांची खोली वाहनचालकांना दिसत नाही. परिणामी दुचाकीस्वार, चारचाकी वाहनचालक तसेच शालेय विद्यार्थी व रुग्णवाहिका चालकांनाही मोठ्या अडचणींचा सामना करावा लागत आहे. विशेषतः रात्रीच्या वेळी हा रस्ता अधिक धोकादायक ठरत असून अपघाताची शक्यता वाढली आहे.
स्थानिक नागरिकांच्या म्हणण्यानुसार, या रस्त्याची अनेकदा तात्पुरती डागडुजी करण्यात आली; मात्र ती काही दिवसांतच उखडून पुन्हा खड्डे निर्माण झाले. त्यामुळे शासनाचा निधी वाया जात असल्याची भावना नागरिक व्यक्त करत आहेत. याऐवजी दर्जेदार व टिकाऊ पद्धतीने रस्त्याची दुरुस्ती करण्यात यावी, अशी मागणी होत आहे.
या रस्त्यावरून दररोज शेतकरी, व्यापारी, विद्यार्थी, शासकीय कर्मचारी तसेच विविध गावांतील नागरिकांची मोठ्या प्रमाणात ये-जा असते. खराब रस्त्यामुळे प्रवासाचा वेळ वाढत असून वाहनांचेही मोठे नुकसान होत आहे. दुचाकी घसरून किरकोळ अपघातांच्या घटनाही घडत असल्याचे नागरिकांनी सांगितले.
नागरिकांनी सार्वजनिक बांधकाम विभाग व संबंधित प्रशासनाने तातडीने या रस्त्याची पाहणी करून कायमस्वरूपी दुरुस्तीचे काम हाती घ्यावे, अशी जोरदार मागणी केली आहे. पावसाळा सुरू असतानाच योग्य उपाययोजना न केल्यास भविष्यात मोठी दुर्घटना घडण्याची भीतीही व्यक्त केली जात आहे.
स्थानिकांनी शासन व लोकप्रतिनिधींनी केवळ आश्वासने न देता प्रत्यक्षात दर्जेदार रस्ते उभारावेत, अशी अपेक्षा व्यक्त केली आहे. सुरक्षित व खड्डेमुक्त रस्ते ही नागरिकांची मूलभूत गरज असून प्रशासनाने याकडे गांभीर्याने लक्ष देण्याची वेळ आली आहे.
