“रस्त्यात खड्डे की खड्ड्यात रस्ता?” मुलचेरा – आष्टी मार्गाची दयनीय अवस्था; तात्काळ दुरुस्ती करा – काँग्रेसचे मुलचेरा तालुका अध्यक्ष प्रमोद गुट्टेवार यांचा इशारा

मुलचेरा :-

गडचिरोली जिल्ह्यातील मुलचेरा – आष्टी मार्गाची अवस्था अत्यंत बिकट झाली असून संपूर्ण रस्ता खड्ड्यांनी विद्रूप झाला आहे. नागरिक अक्षरशः जीव मुठीत धरून प्रवास करत आहेत. रस्त्यात खड्डे आहेत की खड्ड्यात रस्ता आहे, हेच ओळखू येत नाही, अशी संतप्त प्रतिक्रिया वाहनचालक व्यक्त करत आहेत.

दररोज शेकडो विद्यार्थी, शेतकरी, व्यापारी व रुग्णवाहिका या मार्गावरून प्रवास करतात. मात्र सध्या या मार्गावरून जाणे म्हणजे अपघाताला निमंत्रण देण्यासारखे आहे. दुचाकीस्वार घसरून पडण्याच्या घटना वाढल्या असून चारचाकी वाहनांचे मोठ्या प्रमाणात नुकसान होत आहे.

 “प्रशासन झोपेत आहे का?” – प्रमोद गुट्टेवार

काँग्रेसचे मुलचेरा तालुका अध्यक्ष प्रमोद गुट्टेवार यांनी या प्रश्नावर तीव्र संताप व्यक्त केला आहे. त्यांनी प्रशासनाला थेट इशारा देत म्हटले आहे की,

“मुलचेरा – आष्टी मार्गाची अवस्था अत्यंत लाजिरवाणी आहे. नागरिकांच्या जीवाशी खेळ केला जात आहे. तात्काळ खड्डे बुजवून संपूर्ण रस्त्याचे दर्जेदार डांबरीकरण करण्यात यावे, अन्यथा काँग्रेस पक्षाच्या वतीने तीव्र आंदोलन छेडण्यात येईल.”

गुट्टेवार यांनी सार्वजनिक बांधकाम विभाग (PWD) आणि जिल्हा प्रशासनावर निष्क्रियतेचा आरोप करत विचारले आहे की, अपघात झाल्यानंतरच प्रशासनाला जाग येणार का?

 अपघाताचा वाढता धोका

विशेषतः रात्रीच्या वेळी खड्डे दिसत नसल्याने अपघाताचा धोका अधिकच वाढला आहे. पावसाळा जवळ आल्याने परिस्थिती आणखी गंभीर होण्याची शक्यता व्यक्त केली जात आहे. स्थानिक नागरिकांच्या मते, “आता तरी प्रशासनाने तातडीने दखल घ्यावी, अन्यथा मोठी दुर्घटना अटळ आहे.”

 नागरिकांची ठाम मागणी तातडीने सर्व खड्डे बुजवावेत संपूर्ण मार्गाचे पुनर्बांधकाम करावे कायमस्वरूपी मजबूत डांबरीकरण करावे संबंधित अधिकाऱ्यांची जबाबदारी निश्चित करावी

 आंदोलनाचा इशारा

प्रमोद गुट्टेवार यांनी स्पष्ट केले की, जर लवकरात लवकर दुरुस्तीचे काम सुरू झाले नाही तर रस्ता रोको आंदोलन करून प्रशासनाला जागे केले जाईल.

या प्रसंगी अनुप नंदी उपाध्यक्ष मुलचेरा तालुका काँग्रेस कमिटी,कुणाला हवलदार युवा नेते काँग्रेस,संतोष आत्राम युवा नेता काँग्रेस,अंकित और डेंगवार,मुकरू भरलावार,सागर चापले आदी उपस्थितीत होते

मुलचेरा – आष्टी मार्ग हा तालुक्याचा महत्त्वाचा दुवा असून त्याची दुरवस्था ही गंभीर बाब आहे. आता तरी प्रशासनाने वेळीच पावले उचलून नागरिकांचा जीव सुरक्षित करावा, अशी सर्वसामान्यांची अपेक्षा आहे.