लाखो भाविकांचे श्रद्धास्थान असलेल्या प्रभादेवी येथील प्रसिद्ध श्री सिद्धिविनायक मंदिरातील दानपेटी चोरीच्या प्रकरणावरून आता महाराष्ट्राच्या राजकारणात मोठा गदारोळ माजला असून, या संपूर्ण प्रकरणाला अत्यंत तीव्र राजकीय वळण मिळाले आहे. मनसे अध्यक्ष राज ठाकरे यांनी एका कार्यक्रमात मंदिर न्यासाच्या विश्वस्तांनी उपमुख्यमंत्री एकनाथ शिंदे यांना लिहिलेल्या पत्राचा दाखला देत, सिद्धिविनायक मंदिरातून वर्षाला तब्बल १८ कोटी रुपयांची दानचोरी होत असल्याचा खळबळजनक आरोप केला होता. राज ठाकरेंच्या या दाव्यानंतर सिद्धिविनायक मंदिर न्यासाच्या (ट्रस्ट) अध्यक्षांसह विश्वस्तांनी पत्रकार परिषद घेऊन आपली बाजू मांडली; मात्र ही पत्रकार परिषद अत्यंत वादळी ठरली असून, चोरीच्या तपासावरून, राजकीय आरोपांवरून आणि नैतिक जबाबदारी स्वीकारून राजीनामा देण्याच्या मुद्द्यावरून पत्रकार आणि विश्वस्त मंडळामध्ये थेट खडाजंगी पाहायला मिळाली.
पत्रकार परिषदेत बोलताना न्यासाच्या पदाधिकाऱ्यांनी राज ठाकरे यांच्या आरोपांचा जोरदार समाचार घेतला आणि त्यांनी वाचून दाखवलेल्या पत्राचा पूर्णपणे विपर्यास करून महायुती सरकार व सिद्धिविनायक मंदिराला बदनाम करण्याचा राजकीय घाट घातला जात असल्याचा आरोप केला. न्यासाने स्पष्ट केले की, ही चोरी कुणा तिसऱ्याने किंवा बाहेरील यंत्रणेने शोधलेली नसून, मंदिर प्रशासनानेच अत्यंत पारदर्शकपणे पुढाकार घेऊन उघडकीस आणली आहे. दानपेटीतील रक्कमेत तफावत वाटू लागल्यानंतर न्यासाने अप्पर पोलीस आयुक्त विश्वास नांगरे पाटील यांची भेट घेऊन सखोल तपासाची मागणी केली होती. त्यांच्याच मार्गदर्शनाखाली कंट्रोल रूममधील संशयित सिक्युरिटी व सीसीटीव्ही कर्मचारी बदलण्यात आले आणि त्यानंतरच चोरीचा हा संपूर्ण प्रकार कॅमेऱ्यात कैद झाला. या कारवाईत मुख्य आरोपी राजन पेंडुरकर, घाडीगावकर यांच्यासह ९ कर्मचाऱ्यांना पोलिसांच्या मदतीने तात्काळ रंगेहात पकडून अटक करण्यात आली, तर व्हीआयपी दर्शनासाठी ऑनलाईन किंवा जीपे (GPay) द्वारे पैसे घेणाऱ्या व गैरव्यवहार करणाऱ्या एकूण ४६ कर्मचाऱ्यांवर निलंबनाची कठोर कारवाई करण्यात आली आहे.
दरम्यान, पत्रकार परिषदेत विश्वस्तांनी या संपूर्ण प्रकरणाला राजकीय रंग देत अटक करण्यात आलेले बहुतांश कर्मचारी हे उद्धव बाळासाहेब ठाकरे (उबाठा) गटाच्या शाखेशी संबंधित असल्याचा आणि माजी महापौर विशाखा राऊत यांच्या माध्यमातून नोकरीला लागल्याचा गंभीर दावा केला. या दाव्यावर उपस्थित पत्रकारांनी विश्वस्तांना चांगलेच धारेवर धरले.”मराठी तरुणांना नोकरीला लावणे हे चुकीचे आहे का? आणि तुम्ही स्वतः जुन्या शिवसेनेत असताना काम केले आहे, मग आताच याला राजकीय वळण का देताय?” असे थेट सवाल पत्रकारांनी विचारले. त्यावर उत्तर देताना विश्वस्तांनी मुख्य आरोपी राजन पेंडुरकर हा शाखा क्रमांक १९४ शी संबंधित असल्याचे आणि घाडीगावकर हा ‘सामना’ कार्यालयाच्या शेजारीच राहत असल्याचे पुरावे देत, मनसेच्याच यशवंत किल्लेदारांनी यापूर्वी आदेश बांदेकरांच्या अध्यक्षांच्या कार्यकाळावर “सिद्धिविनायकाला खोके आणि मातोश्रीवर खोके” असा आरोप केल्याची आठवण करून दिली. तसेच अयोध्या राम मंदिरातील चोरीचे उदाहरण देत पत्रकारांनी “तुम्ही नैतिक जबाबदारी स्वीकारून राजीनामा देणार का?” असा रोखठोक प्रश्न विचारला असता, विश्वस्त अत्यंत आक्रमक झाले आणि “आम्ही चोरी दडपली नाही, उलट अँटी करप्शनच्या मदतीने चोरांना पकडले; मग चोरी पकडणाऱ्यांनी राजीनामा का द्यायचा?” असा सवाल करत त्यांनी राजीनाम्याची शक्यता फेटाळून लावली.
पोलीस कारवाईत आरोपींकडून प्रत्येकी १० हजार रुपयांप्रमाणे केवळ ८० ते ९० हजार रुपयांचीच रिकव्हरी दाखवण्यात आल्यामुळे न्यासाने या तपासावर असंतोष व्यक्त केला आहे. पूर्वी दर बुधवारी दानपेटी मोजणीत ३० ते ५० लाख रुपये जमा व्हायचे; मात्र ही चोरी पकडल्यानंतर आणि पुजाऱ्यांना मिळणारी दक्षिणा पुन्हा दानपेटीत टाकण्याचा नियम कडक केल्यानंतर, हीच सातत्यपूर्ण रक्कम प्रतिआठवडा ९० लाख ते १.५ कोटी रुपयांवर पोहोचली आहे. दानातील हा मोठा फरक पाहता हा गैरव्यवहार अत्यंत मोठा असून, याचे धागेदोरे वरिष्ठ अधिकाऱ्यांपर्यंत असावेत असा संशय व्यक्त करत न्यासाने या प्रकरणाच्या सीआयडी आणि ACB द्वारे सखोल चौकशीची मागणी केली आहे. याशिवाय तत्कालीन ठाकरे सरकारने ‘शिवभोजन थाळी’साठी सिद्धिविनायक मंदिराच्या तिजोरीतून दिलेला १० कोटी रुपयांचा निधी नेमका कोणत्या केंद्रांना वाटला, याचा हिशोब न्यासाला द्यावा, असा नवा बॉम्बही विश्वस्तांनी टाकला.
विश्वस्तांनी दिलेल्या माहितीनुसार, मंदिरातील पारदर्शकता वाढल्यामुळेच संस्थानाची तिजोरी समृद्ध झाली असून २०२२-२३ मधील १०६ कोटींचे उत्पन्न २०२५-२६ मध्ये १८२ कोटींवर पोहोचले आहे, तर आगामी वर्षात हे बजेट २५० कोटी रुपयांपर्यंत जाण्याचा अंदाज आहे. या वाढलेल्या उत्पन्नातून न्यासाने गरजू रुग्णांसाठीची वैद्यकीय मदत २० कोटींवरून ३६ कोटींपर्यंत वाढवली असून, प्रति रुग्ण २५ हजारांऐवजी ५० हजार रुपयांची मदत देण्याचा ठराव शासनाकडे मंजुरीसाठी पाठवला आहे. यासोबतच आत्महत्याग्रस्त शेतकऱ्यांच्या मुलांना शिष्यवृत्ती आणि ५० हजार विद्यार्थ्यांना मोफत पुस्तके वाटप केली जात आहेत. भविष्यात अशा चोऱ्या रोखण्यासाठी कर्मचाऱ्यांसाठी एकच गेट निश्चित करणे आणि कामावर येताना-जाताना त्यांची खिशासकट कडक तपासणी करण्याचे नवीन नियम लागू करण्यात आले आहेत. एकीकडे राज ठाकरे यांनी उपमुख्यमंत्र्यांच्या नावाने पत्राचा चुकीचा संदर्भ देऊन मंदिराची बदनामी केल्याचा दावा न्यासाने केला असला, तर दुसरीकडे राजकीय आरोप-प्रत्यारोप, जुन्या कारभाराची ऑडिटची मागणी आणि सीआयडी तपासाच्या मागणीमुळे सिद्धिविनायक मंदिरातील दानचोरीचे हे प्रकरण येत्या दिवसांत महाराष्ट्राच्या राजकारणात आणखी तापण्याची स्पष्ट चिन्हे आहेत.
