मुलचेरा : पशुसंवर्धन विभागाच्या वतीने तालुक्यात लाळखुरकत (FMD) रोग प्रतिबंधक लसीकरण मोहिमेच्या ९व्या टप्प्याला सुरुवात करण्यात आली आहे. TVC-मुलचेरा अंतर्गत १३ ऑगस्ट रोजी देशबंधुग्राम येथे या लसीकरण मोहिमेचा प्रारंभ करण्यात आला.
लाळखुरकत हा जनावरांमध्ये वेगाने पसरणारा संसर्गजन्य रोग असून, त्यापासून पशुधनाचे संरक्षण करण्यासाठी नियमित लसीकरण अत्यंत महत्त्वाचे आहे. मोहिमेदरम्यान पशुवैद्यकीय पथकाकडून गावातील पात्र जनावरांना लसीकरण करण्यात येत आहे.
लसीकरणासाठी गाय, म्हैस, वासरे व बैल यांसह पात्र पशुधनाचा समावेश करण्यात आला आहे. पशुपालकांनी आपल्या परिसरातील लसीकरण कार्यक्रमाची माहिती ग्रामपंचायत किंवा जवळच्या पशुवैद्यकीय दवाखान्यातून घेऊन आपल्या जनावरांचे वेळेत लसीकरण करून घ्यावे, असे आवाहन करण्यात आले आहे.
लसीकरणानंतर जनावरांना किरकोळ ताप किंवा सुस्ती जाणवू शकते. मात्र काही अडचण किंवा शंका असल्यास पशुपालकांनी तात्काळ जवळच्या पशुवैद्यकीय अधिकारी किंवा दवाखान्याशी संपर्क साधावा.
पशुवैद्यकीय अधिकारी डॉ. सचिन घालवडकर यांनी पशुपालकांना आपल्या जनावरांचे वेळेत लसीकरण करून घेण्याचे आवाहन केले आहे. लाळखुरकत रोगाचा प्रसार रोखण्यासाठी पशुपालकांनी लसीकरण मोहिमेला सहकार्य करावे, असेही त्यांनी सांगितले.
“निरोगी पशुधन – समृद्ध शेतकरी” या उद्देशाने राबविण्यात येणाऱ्या या मोहिमेत पशुपालकांचा सहभाग महत्त्वाचा असून, आपल्या पशुधनाचे संरक्षण करण्यासाठी प्रत्येक पात्र जनावराचे लसीकरण करून घेण्याचे आवाहन करण्यात आले आहे.
