मुंबई,
दिव्यांग व्यक्तींना शासकीय योजनांचा लाभ अधिक सुलभ, पारदर्शक आणि एकाच ओळखपत्राद्वारे मिळावा या उद्देशाने केंद्र सरकारने युनिक डिसॅबिलिटी आयडी (UDID) अर्थात स्वावलंबन कार्ड योजना सुरू केली आहे. हे कार्ड दिव्यांग व्यक्तींसाठी कायमस्वरूपी डिजिटल ओळखपत्र म्हणून काम करते. या कार्डाच्या माध्यमातून विविध शासकीय योजना, सवलती आणि सेवांचा लाभ एकाच कार्डाच्या आधारे मिळू शकतो.
स्वावलंबन कार्डामुळे दिव्यांग व्यक्तींना प्रत्येक वेळी स्वतंत्र कागदपत्रे सादर करण्याची गरज राहत नाही. देशभरात एकसमान ओळख निर्माण होत असल्याने लाभार्थ्यांना विविध विभागांमध्ये वारंवार प्रमाणपत्रे दाखविण्याचा त्रास कमी होतो. तसेच सर्व माहिती डिजिटल स्वरूपात उपलब्ध असल्याने प्रक्रिया अधिक जलद आणि पारदर्शक बनते.
स्वावलंबन (UDID) कार्डसाठी आवश्यक कागदपत्रे :
आधार कार्ड
पासपोर्ट आकाराचा फोटो
पत्ता पुरावा
ओळख पुरावा
वैद्यकीय कागदपत्रे
अपंगत्व प्रमाणपत्र (असल्यास)
ऑनलाइन अर्ज करताना आवश्यक कागदपत्रे अपलोड करून अर्ज सादर करावा लागतो. त्यानंतर संबंधित वैद्यकीय प्राधिकरणाकडून पडताळणी करण्यात येते. पात्र ठरलेल्या अर्जदाराला UDID कार्ड जारी करण्यात येते.
या कार्डाच्या माध्यमातून दिव्यांग व्यक्तींना शिष्यवृत्ती, शिक्षण, आरोग्य, रोजगार, प्रवास सवलत, सामाजिक सुरक्षा योजना, आर्थिक सहाय्य तसेच केंद्र व राज्य शासनाच्या विविध योजनांचा लाभ घेणे अधिक सोपे होते. याशिवाय कार्ड हरविल्यास किंवा माहिती अद्ययावत करावयाची असल्यास ती प्रक्रिया देखील ऑनलाइन करता येते.
दिव्यांग व्यक्तींनी किंवा त्यांच्या पालकांनी आवश्यक कागदपत्रांसह स्वावलंबन कार्डासाठी लवकरात लवकर ऑनलाइन अर्ज करावा, असे आवाहन शासनाकडून करण्यात आले आहे. हे कार्ड दिव्यांग नागरिकांसाठी सन्मान, सुलभता आणि शासकीय सेवांपर्यंत सहज पोहोच सुनिश्चित करणारे महत्त्वाचे साधन ठरत आहे.
